ഗുരുവായൂർ: ഗുരുവായൂർ ദേവസ്വം ഭരണ സമിതിയിലേക്ക് സർക്കാർ നാമനിർദ്ദേശം ചെയ്ത ജീവനക്കാരുടെ പ്രതിനിധിയായ സി മനോജ് , മനോജ് ബി നായർ എന്നിവരുടെ സത്യപ്രതിജ്ഞ വെള്ളിയാഴ്ച വൈകിട്ട് 4.30 ന് നടക്കും.
ശ്രീഗുരുവായൂരപ്പൻ ഓഡിറ്റോറിയത്തിൽ നടക്കുന്ന സത്യപ്രതിജ്ഞാ ചടങ്ങിൽ. പുതിയ അംഗങ്ങളെ നിയമിച്ചുകൊണ്ടുള്ള സർക്കാർ വിജ്ഞാപനം ദേവസ്വം അഡ്മിനിസ്ട്രേറ്റർ കെ പി വിനയൻ വായിക്കും. നിയുക്ത ഭരണ സമിതി അംഗങ്ങൾക്ക് ദേവസ്വം കമ്മീഷണർ ബിജു പ്രഭാകർ സത്യവാചകം ചൊല്ലി കൊടുക്കും. ദേവസ്വം ചെയർമാൻ ഡോ വി കെ വിജയൻ, ഭരണ സമിതി അംഗങ്ങൾ ഭക്തജനങ്ങൾ തുട ങ്ങിയവർ പങ്കെടുക്കും.
ഇപ്പോൾ സത്യപ്രതിജ്ഞ ചെയ്യുന്ന രണ്ടുപേരും കഴിഞ്ഞ കമ്മിറ്റിയിലും അംഗങ്ങളായിരുന്നു. ഇവരെ നാമനിർദേശം ചെയ്തു കൊണ്ടുള്ള ഉത്തരവിൽ ദേവസ്വം മന്ത്രി വി എൻ വാസവൻ ഒരു മാസം മുൻപ് ഒപ്പിട്ടിരുന്നുവെങ്കിലും കഴിഞ്ഞ ശനിയാഴ്ചയാണ് വിജ്ഞാപനമിറങ്ങിയത്. ഒൻപതംഗങ്ങൾ ഉൾപ്പെട്ടതാണ് ദേവസ്വം ഭരണസമിതി. ഇതിൽ സാമൂതിരിപ്പാട്, ഊരാളൻ, തന്ത്രി എന്നീ മൂന്നു പേർ സ്ഥിരാംഗങ്ങളാണ്. ആറു പേർ നാമനിർ ദേശം ചെയ്യപ്പെടുന്ന രാഷ്ട്രീയ കക്ഷി പ്രതിനിധികളും, ഇതിനു പുറമെ സർക്കാർ പ്രതിനിധിയായി അഡ്മിനിസ്ട്രേറ്ററും ഉണ്ട്.
സാമൂതിരിപ്പാട് കെ സി ശ്രീമാനവേദൻ രാജ, ഊരാളൻ ബ്രഹ്മശ്രീ മല്ലിശ്ശേരി പരമേശ്വരൻ നമ്പൂതിരിപ്പാട്, തന്ത്രി ബ്രഹ്മശ്രീ പി സി ദിനേശൻ നമ്പൂതിരിപ്പാട്, ഭരണ സമിതി ചെയർമാൻ ഡോ വി കെ വിജയൻ, കെ ആർ ഗോപിനാഥ്, വി ജി രവീന്ദ്രൻ, കെ പി വിശ്വനാഥൻ, അഡ്മിനിസ്ട്രേറ്റർ കെ പി വിനയൻ എന്നിവരാണ് ഇപ്പോഴത്തെ ഭരണസമിതി അംഗങ്ങൾ.
