ഗുരുവായൂർ: ഗുരുവായൂര്‍ ക്ഷേത്ര ദര്‍ശനത്തിനായി ക്യൂ കോംപ്ലക്‌സ് നിര്‍മിക്കണമെന്ന് ദേവസ്വം എംപ്ലോയീസ് ഓര്‍ഗനൈസേഷന്‍ വാര്‍ഷിക പൊതുയോഗം ആവശ്യപ്പെട്ടു. ഓണ്‍ലൈന്‍ സംവിധാനം കുറ്റമറ്റതാക്കണമെന്നും ഇ ഓഫീസ് സംവിധാനം ഏര്‍പ്പെടുത്തണമെന്നും ആവശ്യമുന്നയിച്ചു. കൂടുതല്‍ സ്റ്റാഫ് ക്വാര്‍ട്ടേഴ്‌സ് നിര്‍മിക്കുക, വനിത ജീവനക്കാര്‍ക്കായി ലേഡീസ് ക്വാര്‍ട്ടേഴ്‌സ് നിര്‍മിക്കുക എന്നീ ആവശ്യങ്ങളും പ്രമേയത്തിലൂടെ ഉന്നയിച്ചു. സമ്മേളനം സി പി ഐ എം ജില്ലാ കമ്മിറ്റി അംഗമായ നഗരസഭ ചെയര്‍മാന്‍ എം കൃഷ്ണദാസ് ഉദ്ഘാടനം ചെയ്തു.
യോഗത്തിൽ പുതിയ സംഘടന പ്രസിഡന്റായി കെ രമേശന്‍, സെക്രട്ടറിയായി ഇ കെ നാരായണനുണ്ണി, ട്രഷററായി എ വി പ്രശാന്ത് എന്നിവരെ തെരഞ്ഞെടുത്തു.
യൂണിയന്‍ പ്രസിഡന്റ് ഇ കെ നാരായണനുണ്ണി അധ്യക്ഷത വഹിച്ച യോഗത്തിൽ ഏരിയ സെക്രട്ടറി ടി ടി ശിവദാസന്‍, ലോക്കല്‍ സെക്രട്ടറി കെ ആര്‍ സൂരജ്, ദേവസ്വം ഭരണ സമിതി അംഗം സി മനോജ്, യൂണിയന്‍ സെക്രട്ടറി കെ രമേശന്‍, ഏലംകുളം ഉണ്ണികൃഷ്ണന്‍ എന്നിവര്‍ സംസാരിച്ചു.
